شو هوي لبنان؟ بلد؟ وطن؟ جمهورية؟ 10452 كيلومتر مربّع؟ 18 طايفة؟ 15 نهر و3 بحيرات وسلسلتين جبال، وغابات خضرا ما بتنعدّ؟ أرض صغيرة بين جيران كلّن طمعانين فيا؟
هل هوي قصة حزينة؟ ناس يا ماتو يا اختفو يا ضلّن عايشين؟ كمشة ذكريات، شي حلوة شي بشعة؟ كذبة؟ حقيقة؟ حلم؟ كابوس؟
شو هوي؟ أرض حروب ومعارك؟ زبالة عَ مين يشيل ومي وكهربا بالتقنين؟ مشاكل بلا حلول وحلول كلّا مشاكل؟ مطاعم وسهر ورقص وفقش؟ فُرص وأعياد وأكل وشرب وقصبة نية عالترويقة؟ كبة وحمص وتبولة وكنافة بعد نص ليل؟ شمع وبخور وكنايس وجوامع؟ إسبدرين من شهريّة شوفور، وسكربينة بحق سيارة؟
شو هوي؟ مين هوي؟ رئيس جمهورية ماروني، ورئيس وزرا سنّي، ورئيس مجلس نواب شيعي؟ كومة وُزرا ونوّاب وناس لاحقة هيدا وهيداك؟ 4.5 مليون إنسان أناني وسطحي ومصدّق حالو؟ أكتر من مليون رجال ومرا وطفل ما عندن لا أكل ولا طبابة؟ أكتر من مليونين لاجئ فقدو الأمل إنن يرجعو؟
شو هوي؟ أرض قديسين وحراميّه؟ صدور وشفاف وخدود اصطناعية؟ زُعما فاسدين وبيوت دعارة؟ خواريف وثعالب بمزرعة فلتانة؟
شو هوي لبنان؟ سيارات آخر طرز وسرفيسات بآخر عمرا؟ طرقات كلّا جُور، بحر ملوّث، وجبال شوّها الطمع؟ البلد الوحيد بالعالم اللي فيك تشوف التلج والبحر فيه بنفس النهار؟ ثروات مش بالعقل، وفقر مش بالخيال؟
.يمكن لبنان كل هيدا وأكتر. بس تعو نتذكّر شو الأكتر
لبنان هوا جنوبي ببيروت وهوا شمالي بالبقاع. لبنان ريحة التراب بعد أوّل شتوة ومنظر الصنوبر بعد أول تلجة. لبنان جَمعة ع فنجان قهوة ومشاوي كل يوم أحد مع العيلة
هوي كرَم وضيافة بلا حدود. بلد حتى الفقير فيه بيساعد وبيعطي من كل قلبو. لبنان الصغير، ولا أكبر بحبّو للحياة. إجتماعي لدرجة قد ما تجرّب تكون وحدك، بتفشل. هوي نموذج مصغّر عن العالم، بتلاقي فيه كل التناقضات والاختلافات
هوي مصدر إلهام مستمر. حبيب منعشقو بجنونو وأغلاطو. هوي قضية. أجمل وأسمى قضية انكتبلنا ندافع عنّا
لبنان، قبل شي، هوي مستقبلنا. مستقبل ما حدا غيرنا قادر يبنيه. سوا، ع مهلنا، بصبر وتأنّي، كأنّا عم نربّي طفل صغير. ع أمل نكون نعرف شو يعني نربّي طفل صغير
© Claude El Khal, 2016
Adapté du français par MAYA MACARON